அன்பைப் போதிக்காத மதமொன்று
அவனியில் உண்டோ அறிவீர்?
களவும் பொய்யும் பேராசையும்
களையச் சொல்லிடா நெறியுமுண்டோ?
மதம் பிறந்த நாள் முதலாய் இங்கு
மனிதக் குருதி ஓடா நாளுமுண்டோ?
இந்துக்கள், பௌத்தர், சமணரென
இங்கு மோதிய வரலாறும் உண்டே!
முஸ்லிமும் யூதரும் சீக்கியரும்
முரணிக் கொண்டு மடிந்தாரே!
கிறிஸ்தவப் பிரிவுகள் தங்களுக்குள்ளே
குருதிப் போர்கள் புரிந்தாரே!
மதமே ஒன்றெனினும் சாதியத்தால்
மாண்டவர்கள் கொஞ்சமாமோ!
பிரிவுகள் நூறு பேசினாலும் - மனிதன்
பிரிந்து நின்று மடிவதேனோ?
மொத்தத்தில் மனிதனை மனிதனே
கொல்லும் கொடூரம் மதத்தாலோ?
மதத்தின் பெயரால் கொல்லுவோர்,
மதநல்லிணக்கம் பேசுவோரையும்
மண்ணில் வாழ விடுவதில்லையே!

No comments:
Post a Comment