அறியாமையின் ஆபத்து: முட்டாள்களை அடையாளம் காண்பதும், விலகி நிற்பதும் ஏன் அவசியம்?
"முட்டாள்களோடும் தற்குறிகளோடும் ஒருபோதும் விவாதத்தில் இறங்கி விடாதே; ஏனென்றால் அவர்கள் தங்கள் அனுபவத்தால் தங்கள் மட்டத்திற்கு உங்களையும் இழுத்துச் சென்று விடுவார்கள்." — மார்க் ட்வெய்ன் (Mark Twain)
மேல்நாட்டு எழுத்தாளர் மார்க் ட்வெய்ன் கூறிய இந்தப் பொன்மொழி, எக்காலத்திற்கும் பொருந்தக்கூடிய நிதர்சனமான உண்மையாகும். வரலாறு நெடுகிலும் பல அறிஞர்களும் தத்துவஞானிகளும் முட்டாள்களின் இயல்பைப் பற்றியும், அவர்களிடம் நாம் எவ்வாறு எச்சரிக்கையாக இருக்க வேண்டும் என்பதைப் பற்றியும் ஆழமாகப் பதிவு செய்துள்ளனர்.
நாம் வாழும் இந்தச் சமூகத்தில் அறிவார்ந்த வாழ்க்கையை வாழ வேண்டுமென்றால், முதலில் முட்டாள்கள் யார் என்பதை அடையாளம் காண வேண்டும். அவர்களைப் பற்றித் தெரிந்து கொண்டால்தானே, அவர்களின் வலையில் சிக்காமல் நாம் ஒதுங்கிக் கொள்ள முடியும்?
முட்டாள்களின் குணநலன்கள்
ஒருவரை முட்டாள் என்றோ அல்லது தற்குறி என்றோ நாம் எதை வைத்து அடையாளம் காண்பது? அவர்களிடம் கீழ்க்காணும் பண்புகள் மேலோங்கி இருக்கும்:
• கண்மூடித்தனமான நம்பிக்கை: எவ்வித ஆதாரமும் இன்றி, ஊடகங்களிலும் சமூக ஊடகங்களிலும் பரப்பப்படும் செய்திகளை அப்படியே நம்புவார்கள்.
• சுயசிந்தனை இன்மை: சொந்தப் புத்தியைப் பயன்படுத்திச் சிந்திக்காமல், மற்றவர்களைக் கண்மூடித்தனமாகப் பின்பற்றுவார்கள். எதையும் 'ஏன்?' என்று கேள்வி கேட்க மாட்டார்கள்.
• தவறை ஏற்காத பிடிவாதம்: தாங்கள் செய்யும் தவறை ஒருபோதும் ஒப்புக்கொள்ள மாட்டார்கள். உலகில் மற்றவர்கள் மட்டுமே தவறு செய்வார்கள் என்ற எண்ணம் கொண்டிருப்பார்கள்.
• தரம்தாழ்ந்த விமர்சனம்: ஒரு கருத்திற்கு அறிவுப்பூர்வமாகப் பதில் கூற முடியவில்லை என்றால், தனிமனிதத் தாக்குதலிலும் அவதூறு பேசுவதிலும் இறங்குவார்கள். எதிராளியின் குடும்பத்தாரைக் கூட நான்கு தலைமுறைக்கு இழுத்து அசிங்கமாகப் பேசவோ, பதிவிடவோ தயங்க மாட்டார்கள்.
• போலி அறிவு: எந்த ஒரு விடயமாக இருந்தாலும், தமக்கு அதைப் பற்றி எதுவும் தெரியாவிட்டாலும், எல்லாம் தெரிந்ததைப் போலவே காட்டிக் கொள்வார்கள்.
• பாடம் கற்காத தன்மை: ஒரு தவறைச் செய்தால், அதிலிருந்து அனுபவம் பெற்றுத் திருத்திக் கொள்ளாமல், அதே தவறைத் திரும்பத் திரும்பச் செய்வார்கள்.
• உணர்ச்சிவசப்படுதல்: எது உண்மை, எது பொய் என்று ஆராய்வதை விடுத்து வெறுப்பு, கோபம், ஆத்திரம், பிடிவாதம் ஆகியவற்றிற்கே முக்கியத்துவம் கொடுப்பார்கள். தங்களுக்குப் பிடிக்காத கருத்துக்களைக் கண்ணை மூடிக்கொண்டு நிராகரிப்பார்கள்.
சாக்ரடீஸ் காட்டிய பாதையும், வரலாற்றுப் பாடமும்
முட்டாள்தனம் கொண்டவர்கள் தமது சிந்தனையையும் அறிவையும் ஒருபோதும் சுயபரிசோதனை செய்து பார்க்க மாட்டார்கள். அதனால்தான் கிரேக்கத் தத்துவஞானி சாக்ரடீஸ், "எந்த ஒரு விடயத்தையும் ஏன், எதற்கு, எப்படி என்று கேள்வி கேட்காமல் கண்மூடித்தனமாக ஏற்றுக் கொள்ளாதீர்கள்" என்று மக்களை நோக்கி அறைகூவல் விடுத்தார்.
ஆனால், அன்றைய காலகட்டத்தில் அவ்வாறு பகுத்தறிவுப் பேசினார் என்பதற்காகவே அவருக்கு நஞ்சு கொடுத்துக் கொன்றார்கள். இதிலிருந்தே, அந்தக் காலத்தில் எவ்வளவு முட்டாள்கள் அதிகாரத்தில் இருந்திருப்பார்கள் என்பதையும், அவர்களை எவ்வளவு அறியாமை கொண்ட கூட்டம் பின்பற்றியிருக்கும் என்பதையும் நாம் புரிந்து கொள்ளலாம்.
இதற்கு நேர்மாறாக, உண்மையான அறிவாளிகள் தாம் எவ்வளவு நேசிக்கக் கூடிய தலைவராக இருந்தாலும், அவர் கூறும் கருத்து சரியா தவறா என்று நிதானமாக யோசித்துப் பார்த்த பின்பே ஏற்றுக் கொள்வார்கள்.
நம்மைச் சுற்றியுள்ள முட்டாள்களின் வகைகள்
நமது அன்றாட வாழ்க்கையில் வீட்டிலும், அலுவலகங்களிலும், அரசியலிலும், பொதுவெளியிலும் பல வகையான முட்டாள்களை நாம் கடந்து செல்கிறோம். அவர்களைப் பின்வருமாறு வகைப்படுத்தலாம்:
1. நம்பும் முட்டாள்கள்: எதையுமே சிந்திக்காமல் கண்மூடித்தனமாக நம்பிவிடுபவர்கள்.
2. அகந்தை முட்டாள்கள்: தனக்குத்தான் எல்லாம் தெரியும் என்ற ஆணவத்தில் திரிபவர்கள்.
3. பிடிவாத முட்டாள்கள்: உண்மை எதுவென்று தெரிந்தும், ஈகோ காரணமாக அதை ஒப்புக்கொள்ள மறுப்பவர்கள்.
4. கேள்வி கேட்காத முட்டாள்கள்: எதையுமே ஆராயாமல் அப்படியே ஏற்றுக் கொள்பவர்கள்.
5. ஆதாரமற்ற முட்டாள்கள்: எந்த அடிப்படை ஆதாரமும் இல்லாமல் வீண் வாதம் செய்பவர்கள்.
6. பின்பற்றும் முட்டாள்கள்: ஒருவர் சொல்வதை எல்லாம் சுயபுத்தியின்றி அப்படியே பின்பற்றுபவர்கள்.
7. அறிவுரை கூறும் முட்டாள்கள்: தனக்குத் துளியும் தெரியாத விடயங்களிலும் மற்றவர்களுக்கு அறிவுரை கூறுபவர்கள்.
8. வதந்தி நம்பும் முட்டாள்கள்: உண்மையா பொய்யா என்று சோதிக்காமல் வதந்திகளை நம்பிப் பரப்புபவர்கள்.
9. தவறை நியாயப்படுத்தும் முட்டாள்கள்: தன் தவறை எப்பொழுதுமே ஒப்புக்கொள்ளாமல், ஒரே தவறைத் திரும்பத் திரும்பச் செய்து அனுபவம் கற்றுக் கொள்ளாதவர்கள்.
விலகி நிற்பதே விவேகம்
உலகில் எந்த ஒரு விடயத்தையும் தெரிந்து கொள்ளாதவன் முட்டாள் அல்ல; தெரிந்து கொள்ள வாய்ப்பு இருந்தும், அதைத் தெரிந்து கொள்ள மறுத்து ஆராயாமல் இருப்பவனே அடிமுட்டாள். அதுதான் மிகப்பெரிய அறிவின்மை.
இத்தகைய மனிதர்கள் செல்லும் இடமெல்லாம், நமது முன்னேற்றத்திற்குக் கண்ணிவெடி வைக்கும் வேலையைத்தான் செய்வார்கள். இவர்களின் போக்கை நாம் ஆராய்ந்து பார்க்காமல், நாமும் அவர்கள் வழியிலேயே சென்றால் நாமும் அவர்களில் ஒருவராக மாறிவிடுவோம். அதுமட்டுமின்றி, இவர்களைத் திருத்த முயன்றால் நமது பொன்னான நேரத்தையும் மன அமைதியையும் இழந்து, நாமும் அவர்களைப் போலவே மாறிவிடுவோம். எனவே, பகுத்தறிவோடு சிந்தித்து, இத்தகையவர்களிடமிருந்து விலகி நிற்பதே புத்திசாலித்தனம்!


No comments:
Post a Comment